علیرضا علوی زنجانی:
بسمه تعالی
نوحه امام حسن مجتبی (ع )
اهنگ ：یا امام زمان شیعه ده احساسه باخ
@@@@@@@@
ویر خبر زینبیم داده حسینم گله
لبلریمدن آخان زهریلی قانی سیله
جگریم یاندی گل قلبیم اوتلاندی گل
یاحسین جان (۴)
@@@@@@@@
اولورم آی باجی داده حسینی چاغیر
جگریم دوغرانوب اولدی مصیبت آغیر
بیش یاشیندان باجی باشیوه غملر یاغیر
جگریم یاندی گل قلبیم اوتلاندی گل
یا حسین جان(۴)
@@@@@@
آنامز یوخ باجی ای آناما نایبه
صبر ایله آغلاما صبره اولان قایمه
سنه قربان اولوم عاقله سن عالمه
جگریم یاندی گل قلبیم اوتلاندی گل یا حسین جان (۴)
@@@@@
گیت خبر ویر باجی ئولدی حسن یا حسین.
باد محنت اسوب سولدی چمن یاحسین.
غسل قیل سن اوزون ایله کفن یاحسین
جگریم یاندی گل قلبیم اودلاندی گل
یا حسین جان (۴ )
@@@@@@
قوی حسینیم گله باشلیا تا یاسیمی.
گوگلوم ایستور گورم قهرمان عباسیمی.
دی آتان جان ویرور یاسه گله قاسیمی
دی حسینیم گله باشلیا تا یاسیمی
جگریم یاندی گل قلبیم اوتلاندی گل
یا حسین جان (۴)
@@@@@@
زهر دشمن منیم یاندوروب اکبادیمی
اوجادیب گویلره غصه لی فریادیمی
جعده ایتدی یتیم ظلمیله اولادیمی
جگریم یاندی گل قلبیم اوتلاندی گل یا حسین جان (۴)
@@@@@@
أسه صرصر يلی گلشنه تز ؛گل صولار
زهر ایدیبدر اثر طاقتیم الدن آلار
عدنیده فاطمه باشینه قاره سالار
جگریم یاندی گل قلبیم اوتلاندی گل یا حسین جان (۴)
@@@@@@
بالامی گیت گتیر قویما گیلان آغلاسین
قویما هجران غمی سینه سینی داغلاسین
دی حسینیم اونی اوغلی کیمی ساخلاسین
جگریم یاندی گل قلبیم اوتلاندی گل
یا حسین جان (۴)
@@@@@@
شاعر ：علیرضا علوی زنجانی
۹۶/۸/۱۹
درباره این سایت